Etter kommunesamanslåingane i vinter, er det fleire som har vore spente på kva kommunar som ville få flest elevar med nynorsk som hovudmål.
Torsdag kom fasiten frå Utdanningsdirektoratet:
- Bjørnafjorden: 3091
- Sunnfjord: 3020
- Alver: 2845 elevar
- Hå: 2625
- Ålesund: 2499
- Stord: 2467
- Øygarden: 2429
- Time: 2344
- Kinn: 2077
- Voss: 1824
Bjørnafjorden rett sør for Bergen har hatt ein vekst på 17 nynorskelevar sidan Fusa og Os slo seg saman ved nyttår.
Sidan 2018 har Os hatt førsteplassen, og trass i at fleire samanslåtte nynorskkommunar har fått større samla folketal, så held Bjørnafjorden på førsteplassen.
– Det er så kjekt å høyra! Veldig gledeleg! Eg visste me låg høgt oppe, men trudde ikkje me skulle hamna på førsteplass på grunn av samanslåingane, seier Trine Lindborg, ordførar i Bjørnafjorden kommune på telefon til Framtida.no.
– Eg trur mange ser at det er eit rikt språk, og at det ligg tett opp til dialekten vår.
Les reportasje: Skulebiblioteket er hjartet i skulen
Ny nedgang i Bergen
Nye Ålesund kommune vedtok nyleg ny språkbruksplan, men Noregs største nynorskkommune hamnar berre på femteplass med 2499 nynorskelevar.
Noregs nest største by, Bergen, har eit bystyrefleirtal bak ønskjet om å vera nynorskhovudstaden i landet, men opplevde ein nedgang på 16 nynorskelevar frå førre skuleår. I budsjettet for neste år har fleirtalet blitt samde om å oppretta ein nynorskklasse i sentrum og fleire andre nynorsktiltak.
Nynorsk i alle fylke
For første gong på lenge har skuleåret starta med nynorskelevar i alle fylke. Vestland har desidert flest nynorskelevar, men er også det fylket som mistar flest elevar samanlikna med då dei var Sogn og Fjordane og Hordaland i fjor:
- Vestland: 37 151 (-532)
- Møre og Romsdal: 15 677 (-240)
- Rogaland: 14 318 (-44)
- Innlandet: 3 244 (-138)
- Vestfold og Telemark: 1 824 (-38)
- Agder: 1 365 (-25)
- Viken: 588 (-50)
- Trøndelag: 6 (+3)
- Nordland: 3 (-2)
- Troms og Finnmark: 2 (-3)
- Oslo: 1 (-1)
Det høyrer med til soga at Vestland mista 139 nynorskelevar då Hornindal slo seg saman med Volda i Møre og Romsdal ved nyttår.
Oppgang for samisk
Totalt sett er det 74 179 elevar som har nynorsk som hovudmål no. Det er 1066 færre elevar enn i fjor. Talet på bokmålselevar gjekk opp med berre 33 til 554 525.
Talet på samisk elevar er 874 elevar. Det er ein auke på 17 elevar.
